Mark 14

Jisas Ruing Pilik Kanggᵾp Ambrung

1Jura wamp kᵾⱡ nga bret yis mundi namᵾndᵾk, wei normᵾn ui ni kᵾn, etpa ti rᵾng normᵾn ui ei nga rumbᵾⱡ raⱡ pelinga, pris kᵾⱡ nga wu kuimbal kᵾⱡ kᵾn, mi ik mbo wu na mbᵾ ndi, Jisas ndangga nimbun imp moⱡᵾp tᵾpᵾn, rop kundmin nᵾk, uⱡ ⱡawa mat kurᵾrᵾng. 2Wote, wu mbᵾ ndi, nᵾk mel, “Etpa ti rᵾng nuing ui ei kᵾn, ropᵾn kundmin ndam, wamp mbᵾ ndi, tᵾn kᵾn tek rombulk, el rok iting!” nᵾtᵾng.

Jisas Betani Kona Ila Kopung Kandrung

3Jisas noi Betani ila kint pombuⱡma rᵾrᵾm wu Saimon nga manga ila, rᵾng nomba moⱡnga, amp ti ndi, kopung ronduⱡ mura rui kai ming ti, mepa omba tᵾpa ambuⱡpa, Jisas nga peng ila, oi ndupa, kopung kᵾndrᵾm. 4Wote, wamp mat ila morung nimbᵾ ndi, amp ei nga itim uⱡ ni kandᵾk, popᵾⱡ kolk, en enim nᵾk int yant etᵾk nᵾk mel, “Kopung mura rui kai ei, etpa ge ndonum ei ka? 5Kopung kai ei tᵾpᵾn mepᵾn, mbun mel rarᵾp ropᵾn, elimina ndam, ku moni 300 kina na ei mel telmina. Wote ku ei, tᵾpᵾn wamp kurpa nom mat ngoⱡmina,” nᵾtᵾng. Wote amp ni, ik mura kit mat ngurung.

6Ni kᵾn, Jisas ndi, nimba mel, “Amp ei ndi, na nga uⱡ kai ti endnᵾm ei, tangga kandᵾk, kui itᵾi! Nambuⱡ emel, amp ei, mbun ngonmin? 7Wamp kurpa mbᵾ, enim kᵾn, rᵾk rᵾk muⱡing wamp mbᵾ, ki nguimp nᵾkᵾn pin ndam, nguin mint. Wote, na enim kᵾn, ui mbila nga rᵾk rᵾk rᵾp rop muⱡi nᵾmbᵾⱡmin. 8Amp ei ndi, na nga endᵾmba uⱡ ei mel, kapⱡa enim. Na nga on ei, tᵾk mek puk, wamp on kona ila kopung kandᵾk ᵾngᵾndeing ei mel, unt kopung kandnᵾm. 9Enim ik kupa ei, kundᵾp nᵾnt. Muⱡ uⱡ mbila, Got nga rᵾnang ik kai kᵾⱡ, wamp nᵾk ngᵾng ei kᵾn, ya amp ei ndi, enim uⱡ kai ei, pendᵾk timan rok nguing,” nitim.

Jura Ndi, Jisas Rᵾk Murum

10Wote, kitip kᵾni wu 12 ni kᵾⱡ nga ti, Juras Iskariyot wu ni ndi mba, Jisas rᵾk moⱡpa, wu Pris kᵾⱡ nga wu kuimbal nimbᵾ, kundᵾp nimp nimba purum.

11Wu nimbᵾ ndi, Juras nimba urum ik ni, pilik kai pilik, ku moni mat nguimin nᵾk, nᵾk mᵾi rorung. Pilpa yant omba, Jisas rᵾk moⱡmba ei nga nombuⱡa mam ti kᵾrᵾrᵾm.

Jisas Kᵾn Elim Nga Kitip Kᵾni Wu Kᵾⱡ Kᵾn Etpa Ti Rᵾng Norung

12Etpa Ti rᵾng normᵾn ui ei nga kng sipsip rok koik, bret yis mundi namᵾndᵾk normᵾn ui ei, puⱡ mondrung ui ei kᵾn, Jisas elim nga kitip kᵾni wu kᵾⱡ ndi, elim waldᵾk nᵾk mel, “Nim nga Etpa Ti Rᵾng ei, manga nant ila tᵾp kun itᵾmin pamin?” nᵾtᵾng.

13Wote, elim nga kitip kᵾni wu raⱡ tᵾpa mundpa, nimba mel, “Kona peng ou ila rukᵾr pukᵾⱡ kᵾnanggila. Wu ti, nu kuⱡpa mepa om wu ei, pep rokᵾⱡ, akil tekᵾⱡ pukᵾⱡ, murᵾk pum manga ila, manga puⱡ wu ei kundkᵾⱡ, ‘Ik Mbo Wu ei ndi waldpa, na nga kitip kᵾni wu kᵾⱡ kᵾn, nanᵾm kᵾn, Etpa Ti Rᵾng ei, manga nant ila moⱡpᵾn nuimin ei nga, tᵾpa ora ndangga nᵾl!’ nitim.

15Waldanggila, manga puⱡ wu ei ndi, enmbil manga kᵾkaⱡ oⱡa orunga, etpa kai etpa tem ti, tᵾpa ora ndumba, rᵾng mbᵾ tᵾk kun etᵾk, muⱡᵾnggil pᵾl!” nitim.

16Kitip kᵾni wu ni raⱡ pukᵾⱡ, kona peng ou nila, Jisas nitim uⱡ nimbᵾ mel, kandkᵾⱡ tᵾkᵾⱡ, wote Etpa Ti Rᵾng mbᵾ, tᵾp kun etᵾk morunggil.

17Wote, kona ant ei mana puⱡnga, Jisas kᵾn, elim nga kitip kᵾni wu 12 kᵾⱡ kᵾn orung. 18Rᵾng nimbᵾ nok moⱡina, Jisas ndi, nimba mel, “Enim ik kupa ei kundᵾp nᵾnt. Enim wu kᵾⱡ nga ti ndi, na ring nimba rᵾk moⱡmba. Rᵾk moⱡmba wu ei, na kᵾn rᵾng tenda ila nonumbᵾⱡ,” nitim.

19Wu nimbᵾ pora, mundmong mindil tᵾk, kᵾⱡ kel numan pilik elpa elpa Jisas waldᵾk nᵾk mel, “Nim nᵾn ei, na kundᵾk nᵾn ei?” nᵾtᵾng.

20Wote Jisas ndi, punt ropa nimba mel, “Ei enim wu 12 kᵾⱡ nga wu ti, na kᵾn ming tenda ila bret nu mundpa, nom wu ei ndi etmba. 21Buk Wingti ei ndi, ik ti nimba mel, “Muⱡᵾl Wu Kupa ei, koⱡmba nitim ei mel koⱡmba. Wote, Muⱡᵾl Wu Kupa ei, rᵾk moⱡum wu ei, mindil mam ti, nomba ei ka! Wu ei mam ndi, mi nambilnga ndam, kai elinga,” nitim.

Jisas Ndi, Elim Nga Kitip Kᵾni Wu Kᵾⱡ Rᵾng Ngurum

22Rᵾng nok moⱡina, Jisas ndi, bret ti tᵾpa, Got kᵾn angge nimba, puk ropa wu ni kᵾⱡ ngumba nimba mel, “Tᵾk nᵾi! Ei, na nga kᵾng ei,” nitim.

23Wote, nu wain ming i ku etpa, Got kᵾn angge nimba, wu ni kᵾⱡ nguⱡnga nok, kapⱡa endᵾtᵾng. 24Wote Jisas ndi, kundpa nimba mel, “Ya ei, na nga mema ei, wamp minal Got kᵾn, tᵾpa tenda etmba ei nga, nᵾndᵾp oi ndont. 25Enim ik kupa ei, kundᵾp nᵾnt. Na mbo wain ei, aldpa nui nᵾnimp. Nandᵾp moⱡᵾp, mbo Got nga tᵾpa mumuk rui kona ila nu wain kont ti, elpa nuimp,” nitim.

26Wote, kinan kat nᵾk pendᵾk, pena ok, noi Olip komnga ila ping pilik purung.

Jisas Elim Pita Ndi, Tᵾpa Mbuⱡ Ngumba Nitim

27Jisas ndi, wu kᵾⱡ kundpa nimba mel, “Got nga ik mong ti, unt pai nok rok pendᵾtᵾn ei ndi, nimba mel,

‘Got ndi, kng sipsip rᵾp wu ei, ropa kundangga kᵾn, kng sipsip mbᵾ, mbᵾⱡ mbaⱡ nᵾk ping,’ nᵾtᵾm
Wote, ik mong petᵾm ei mel ku, enim ndi, na wak rok, enim nung nᵾk ping.
28Wote, na ⱡoporop oⱡa munt ei kᵾn, enim wᵾl Galili orunga pi nᵾpi, na kuimp tep mbi,” nitim.

29Pita ndi, punt ropa nimba mel, “Wu wei mbᵾ ndi, nim wak rok pung ndam, na ndi, nim wak rui nᵾrimp mon!” nitim.

30Jisas ndi, Pita kundpa nimba mel, “Nim ik kupa ei kundᵾp nᵾnt. Akup rumbuldi, kᵾi kulda ropa raⱡ indi nᵾndi, nim ndi, na pili napᵾt nᵾkᵾn, raldika indᵾn,” nitim.

31Pita ndi, ik pilkᵾⱡ ngumba, nimba mel, “Na ndi, nim pili napᵾt ni nᵾnimp mon! Nim kᵾn ei mel, na kuⱡimp!” nitim. Wote kitip kᵾni wu kat ndi, i ku etᵾk nᵾtᵾng.

Jisas Getsemani Pana Ila Atinga Rᵾrᵾm

32Wote puk, Getsemani ni kona tila puk kᵾn, Jisas ndi, elim nga kitip kᵾni wu kᵾⱡ, kundpa nimba mel, “Na atinga ruimp punt ei kᵾn, enim ya ila muⱡᵾi!” nitim. 33I nimba, Pita, Jeims, Jon, nga tᵾpa melinga, elim kᵾn purung. Ni kᵾn, elim nga numan orunga mbun mam ti, elim kᵾn urum. 34Wu raldika orunga ni kᵾⱡ, kundpa nimba mel, “Na kuⱡimp ei nga, na nga mundmong orunga mindil etpa, na tᵾpa mana ndumba enim. Ei nga, enim ya kona ila nokundᵾk, mong tᵾk muⱡᵾi!” nitim.

35Wu ni kᵾⱡ muⱡeing nimba mondpa, onunga kot merᵾng mba, mᵾi ila rumᵾⱡi pepa, mindil nga ui ei omba, keri mba mel pem ndam, omba keri pangga nimba, atinga rᵾrᵾm. 36Wote, atinga rᵾrᵾm, nimba mel, “Wuta! Na nga Wuta ye! Nim uⱡ mbᵾ kapⱡa etᵾn wu ei ndi, ya uⱡ mbun na kᵾn onum mbᵾ omba, keri pangga ni. Wote, na nga numan pint ei mel mon! Nim nga numan pin uⱡ ei mel iti!” nitim. Nimba kᵾn, atinga rᵾrᵾm.

37Atinga ropa pendpa, yant omba kᵾndrᵾm mel, kitip kᵾni wu raldika ni kᵾⱡ, ur petᵾng. Jisas ndi, Pita kundpa nimba mel, “Saimon ye! Nim ur petᵾm ei ka! Ant mong tenda tila nim kapⱡa rᵾt nᵾkᵾn, oⱡa muⱡᵾn muna mon?” nitim. 38“Enim ur pi napᵾk, atinga rok mint muⱡangina, Seitan ndi, enim oⱡa tᵾpa kᵾni nᵾkᵾnangga! Muⱡnga ei ndi, atinga ramp ka nimba pᵾnᵾm, wote kᵾng kᵾⱡ ndi enᵾmp monum,” nitim.

39Nimba pendpa, int mba, unt atinga ropa ik nitim ik kᵾⱡ, ku rᵾrᵾm. 40Wote, yant omba wu ni kᵾⱡ, ur ku petᵾng ila kundrum. Ur pili pᵾla, rᵾt nᵾk oⱡa molk, elim kundᵾk ning ik mbᵾ pilik rundrung. 41Ama wote, int mba atinga ropa, raldika endpa yant omba, wu ni kᵾⱡ kundpa nimba mel, “Enim muⱡ tᵾk ur ku pek mormᵾn ei? Enim ur penmᵾn, ei manda. Akup Muⱡᵾl Wu Kupa ei tᵾpa, wamp uⱡ kit etmin mbᵾ nga ki pol ila tendᵾmba, ui ei onum ei kanmᵾn ye! 42Oⱡa muⱡᵾiya pamin! Kᵾnᵾiya! Na rᵾk moⱡum wu ni, ya onum!” nitim.

Jisas Tᵾk Imp Morung

43Jisas ik nimba moⱡnga, kitip kᵾni wu 12 kᵾⱡ nga, Juras nᵾtmᵾn wu ni ndi, wu el kum kat, wu pris kuimbal na, mi ik mbo wu na, manga wingti rᵾp wu na mbᵾ ndi, tᵾk mundrᵾng ila mepa urum. Wu el kum orung nimbᵾ, koiya na, tᵾmbᵾⱡ na mat mek orung. 44Ei kᵾn, rᵾk murum wu ni ndi, wu el kum orunga nimbᵾ nimba ndoimp rondpa nimba mel, “Na ndi, rᵾk mbo keta nu rop nᵾnt wu ei, kan ngᵾk, rᵾp ronduⱡ etᵾk, mek pᵾi!” nitim.

45Ni kᵾn, Juras ndi, Jisas murum kona nila kun rᵾk mba, “Ik mbo wu ye!” nimba, keta nu ropa nurum. 46Nᵾk pendᵾtᵾng ni mel, tᵾngᵾnda rᵾk ok, Jisas tᵾk imp molk kan ngurung. 47Ni kᵾn, kitip kᵾni wu wᵾng orunga murum ni ndi, koiya ou ti, kᵾp ropa pendᵾtᵾm ni, kuⱡimp ropa ekit tᵾpa, wu Pris kuimbal ei nga kindmant wu ni nga, kum omung ei, ropa puⱡa rᵾrᵾm. 48Wote Jisas ndi, nimba mel, “Na punt mong wu ti, nᵾk pilik enim tᵾmbᵾⱡ na, koiya na mel mbᵾ, mek ok, na kan nguing onmᵾn ei? 49Na ui mbila rᵾk rᵾk enim kᵾn moⱡᵾp, manga wingti mbila, Got nga ik ei mbo endᵾp it ei kᵾn, na tᵾk kan ngui nganggᵾrᵾng ni? Wote, ya enmin uⱡ ei ndi, Got nga ik mong ti, Buk Wingti ila nimba pinditim ik ei omba, kupa enim,” nitim. 50Wote ei kᵾn, kitip kᵾni wu ni kᵾⱡ, Jisas mondᵾk kelik nung nᵾk purung.

51Puⱡnga, muⱡ mbal kurmᵾⱡᵾ rᵾrᵾm kang wu ti, Jisas pep ropa akil titim. Kang wu ni, tᵾp imp monmᵾn nᵾk elingina, nᵾng nimba puⱡnga, muⱡ mbal rᵾrᵾm ni potᵾk yant tilingina we giyu gou purum.

Jisas Ni, Mba Wu Pris Kaunsil Ei Nga Kuimp Keta Ila Ʉnggᵾtᵾm

53Wote, Jisas tᵾk mek puk, wu Pris kuimbal ei nga mang kona ila wu pris kuimbal kᵾⱡ kᵾn, manga wingti rᵾp wu kᵾⱡ kᵾn, mi ik mbo wu kᵾⱡ kᵾn, tᵾk mou rok morung, kona nila purung. 54Pita ni, Jisas mek purung ni mel, akil tepa mba, wu pris peng mumuk ni nga mang keta ila, el wu nimbᵾ, pena ndip kalk morung nimbᵾ kᵾn, mba kup etpa, ndip pilpa murum. 55Wu pris kuimbal mbᵾ kᵾn, Jura nga wu nuim nimbᵾ kᵾn, Jisas namba ik tila nᵾmp oⱡa ndupᵾn, tepᵾn rop kundmin nᵾk pᵾⱡ ti, kurᵾrᵾng ei, pᵾⱡ mat kandᵾk ti natᵾtᵾng. 56Wote, wu kat ndi, ik kol rok, Jisas ik mat nilinga, pitmin ku nᵾtᵾng. Wote, wu mbᵾ nga ik nᵾtᵾng kᵾⱡ omba, tenda pi nᵾpᵾrᵾm.

57Wote, wu mat ndi, anggilik kol rok, Jisas nga ik mat nᵾndᵾtᵾng, “Wu ei ndi, ik ti nitim pitmin ei, ‘Wamp nga ki ei ndi, manga wingti mam rakrung, ei rok tᵾp, mana tᵾp, wote rumbᵾⱡ raldika mel manga ei, rakᵾp timp nitim ei, ya wamp nga ki ei ndi, rakurmᵾn uⱡ ni mel mon nitim,’” nᵾtᵾng. 59Ik i nᵾtᵾng ik mbᵾ ndi, kupa iti nᵾtᵾtᵾm.

60Wote, wu Pris peng mumuk ni ndi, rᵾk ila anggilpa, Jisas ni waldpa nimba mel, “Nim kᵾn kol rok, ik ndo ngᵾk nᵾnmᵾn ei nga, nᵾkᵾn int nduin ik ti kep, pilik rundᵾn ei?” nitim.

61Wu ei ndi, nitim ik ni, Jisas ndi, pilpa kui itim. Wote, wu Pris peng mumuk ni ndi, aldpa waldpa nimba mel, “Nim Kraist, nim Got wamp memp pendᵾtᵾm wu ei nga kangᵾm ei?” nitim. 62Jisas ndi, punt ropa nimba mel, “Int nᵾn wu ei, na waⱡᵾm ei ka!” nitim. “Na Muⱡᵾl Wu Kupa ei, enim pora kandᵾk muⱡangina, Got ronduⱡ tepa mul wu ei nga ki mbo orunga moⱡᵾp, muⱡ kona kopa pol ila, yant wamba kᵾning ei ka!” nitim. 63Wote, wu pris kuimbal ni ndi, elim nga wal pᵾki ni kᵾⱡ ambuⱡpa ondpa, waldpa nimba mel, “Namba ik ti nga kombuⱡpᵾn kandpᵾn nimin?” nitim. 64“Elim meka ropa kelpa, ik kit nᵾnᵾm pᵾnmin ei kᵾn, enim ndi, namba nᵾk pᵾnmin?” nitim. Jisas kuⱡangga nᵾtᵾng ik ei, wu ama ou ndupa mel ndi nᵾtᵾng. Ei nga, wu ei uⱡ kit etᵾm ei nga kuⱡangga nᵾtᵾng.

65Wu mat ndi, Jisas rumin nᵾk wu mat ndi, elim nga kuimp keta ila ol rok, muⱡ ping ti ndi, mong raⱡ ila kan rok, ki kom ndi rok, nᵾk mel, “Painui wu ye! Nim ki kom ndi ronum ei, wu nam ndi ronum?” nᵾtᵾng. Wote, el wu mat ila morung ni kᵾⱡ ndi, Jisas i ku etᵾk, ambulk int tᵾk ki raka ndi rorung.

Pita Ndi, Jisas Kᵾni Nakᵾndᵾr Nimba Ik Ronduⱡ Mondpa Nitim

66Wote Pita ni, wu pris kuimbal ni nga mang keta nila ndip pilpa murum. Wote, wu pris kuimbal ei nga kongun amp wendᵾp ni kᵾⱡ na ti ndi, pena omba, ndip pilpa murum ni kᵾn, kandpa nimba mel, “Nim Nasaret wu, Jisas ei kᵾn kunda, rup rokᵾⱡ morumbil ni ka!” nitim.

68Wote Pita ndi, ik ni, punt ropa nimba mel, “Nim ik nant ei nga nᵾn ei, na pilip kun iti natᵾnt ei ka!” nitim. Nimba kᵾn, manga tip orunga mbi nimba elinga, kᵾi kulda rᵾrᵾm.

69Kongun ambuⱡa wendᵾp ni ndi, Pita mba murum kona nila aldpa kandpa nimba mel, “Ya wu ei, wu nimbᵾ nga wu ti,” nimba, wamp ndip pilik morung wamp nimbᵾ, kundpa nitim. 70Ni kᵾn, Pita ndi, elim mon ku nitim. Wote onunga kot moⱡina, wamp morung nimbᵾ nga mat ndi, Pita kundᵾk nᵾk mel, “Nim wu kᵾⱡ nga ti nᵾmp kanmin ei ka! Nambuⱡ emel, nim Galili kona ila wu ei ku! Wote, wu Jisas ei, Galili kona ila wu ei ku,” nᵾtᵾng.

71Wote elim ndi, mon nimba ronduⱡ mundpa, mi tepa nimba mel, “Enim ndi, na kᵾn rup rokᵾⱡ morunggil ninmᵾn ei pilik kun iti natᵾk nimin ei ka! Na kep nᵾnt ndam, na Got ndi, mbun ngangga,” nitim.

72I nilinga, kᵾi kulda ropa raⱡ inditim. Ei kᵾn, Pita ndi, Jisas nga ik elim kᵾn nitim ni, tᵾpa mindᵾtᵾm. “Kᵾi kulda ropa raⱡ indi nᵾndi kᵾn, nim ndi, na pili napᵾt nᵾkᵾn kᵾⱡ, rondkᵾn raldika indin,” nitim. Ik ni tᵾpa mendpa kᵾn, ka kᵾk nimba itim.